Белгискиот премиер Барт Де Вевер ќе му ја понуди оставката на својата влада на кралот Филип, јавуваат локалните медиуми. Овој потег доаѓа откако ноќните преговори за државниот буџет завршија без договор. Јавниот сервис VRT пренесува дека средбата на Де Вевер со кралот е закажана за 9:30 часот, наведува Euronews.
Владата е исправена пред потребата да обезбеди заштеди во износ од 10 милијарди евра, со цел да ги исполни правилата на Европската унија за јавната потрошувачка. Неуспехот во преговорите веќе предизвика реакција на финансиските пазари: каматните стапки на белгиските државни обврзници пораснаа, што ги зголемува трошоците за сервисирање на државниот долг.
Toujours pas d’accord sur le budget : Bart De Wever va démissionner, il est attendu chez le roi https://t.co/763npBe4EP
— RTL info (@rtlinfo) November 2, 2026
Буџетските предизвици на Белгија се сериозни. Минатата година буџетскиот дефицит изнесуваше 5 отсто – што е значително над границата од 3 отсто утврдена од ЕУ. Истовремено, јавниот долг на земјата надминува 735 милијарди евра, односно повеќе од 110 отсто од БДП, што е далеку над прагот од 60 отсто.
Одлуката е во рацете на кралот
Кралот Филип сега треба да ги одреди следните чекори. Доколку ја прифати оставката, Белгија ќе се соочи со предвремени избори. Алтернативно, кралот може да ја одбие оставката или да ја задржи на разгледување, додека се вложуваат напори за изнаоѓање друго решение за политичката криза.
