Портпаролот на рускиот претседател, Дмитриј Песков денеска изјави дека Кремљ нема информации за можна болест на лидерот на Чеченската Република Рамзан Кадиров, а исто така ги демантираше информациите дека Кадиров наводно се сретнал со Владимир Путин.

Претходно на социјалните мрежи се појавија непотврдени информации дека Кадиров наводно починал ноќе во Централната клиничка болница на Управата на претседателот на Руската Федерација, пренесува РИА Новости.

Украинските разузнавачи објавија информации дека Кадиров е во тешка здравствена состојба. Кадиров, меѓутоа, неодамна објави видео од неговата прошетка и ги покани оние кои не ја разликуваат вистината од лагата на интернет да прошетаат на чист воздух.

„Немаме никакви информации. Во секој случај, претседателската администрација тешко може да даде информации за неговата здравствена состојба. Значи, нема што да кажеме овде“, одговори Песков на новинарите на прашањето колку Кремљ е загрижен за состојбата на Кадиров.

Покрај тоа, Песков ги коментираше извештаите дека Кадиров наводно одлетал во Москва во неделата за евентуално да се сретне со Путин.

„Немаше средби со Путин“, одговори Песков.