Русија остро го осудува неодамнешниот напад на кубанската амбасада во САД и инсистира да се спроведе истрага што е можно поскоро за околностите на тој инцидент, изјави портпаролката на руското Министерство за надворешни работи, Марија Захарова.

„Најостро го осудуваме нападот врз кубанската амбасада во САД, во кој во неделата на 24 септември беа фрлени два молотови коктели врз зградата на Амбасадата. Нападот не смее да помине неказнето и одговорните треба да бидат најстрого казнети“, рече Захарова.

Таа истакна дека нападот не е прв ваков инцидент насочен против кубанската дипломатска мисија во Вашингтон и дека е извршен поради „атмосферата на закани за кубанските власти“, пренесе ТАСС.

„Уште еднаш ги повикуваме САД безусловно да ја осигураат безбедноста на странските дипломатски претставништва на своја територија, со строго почитување на меѓународните обврски. Ја изразуваме нашата солидарност со братскиот народ на Република Куба и нашата целосна поддршка за властите на таа земја“, додаде Захарова.