Турскиот претседател Реџеп Таип Ердоган го искористи говорот за човекови права за да го обвини Западот за „варварство“ поради неговиот став за војната меѓу Израел и Хамас.

– Израел изврши злосторства и масакри кои ќе го срамат целото човештво – изјави Ердоган пред преполната куќа во Истанбул ден пред 75-годишнината од Универзалната декларација за човекови права, нарекувајќи го нападот на Израел врз Појасот Газа „ментална болест“.

Според него, во Појасот Газа се уништуваат сите вредности поврзани со човештвото. Соочени со таква суровост, меѓународните институции и организациите за човекови права не преземаат никакви конкретни чекори за да ги спречат ваквите прекршувања“, нагласи турскиот лидер.

– САД го поддржуваат Израел со своите пари и воена опрема. Еј, Америка! Колку ќе платите за ова? – заклучи Ердоган.

Претходно во саботата турскиот претседател повика на реформи во Обединетите нации откако Вашингтон стави вето на резолуцијата на Советот за безбедност на ОН за Газа.