Белгискиот министер за надворешни работи Максим Прево во ја обвини Европската комисија дека предлага „недоволни“ мерки против трговијата со нелегални израелски населби, бидејќи земјите-членки на ЕУ се разидуваат по ова прашање.

Прево рече дека Комисијата им дала на земјите-членки само „коска за глодање“, наместо да предложи конкретни мерки за ограничување на трговијата со населбите на Западниот Брег, пишува „Политико“.

Министрите за надворешни работи на ЕУ, собрани во Брисел, разговараа за документ на Европската комисија во кој се предлагаат различни опции за ограничување на трговијата, вклучувајќи „казнени тарифи“ и систем за лиценцирање. Сепак, според белгискиот министер, тој документ не ги исполнува условите за конкретни предлози за забрана или ограничување на трговијата.

„Европската комисија конечно предложи неколку опции, и тоа само на две страници“, им рече Прево на новинарите по пристигнувањето на состанокот на Советот за надворешни работи. „Затоа, се чини дека ни е дадена коска за глодање, наместо вистинска волја да продолжиме напред“.

Прево додаде дека предложените мерки „се крајно несоодветни со оглед на потребата да се биде кредибилен геополитички актер во израелско-палестинското прашање, што Европската Унија за жал не е веќе некое време“.

Иницијативата за ограничување на трговијата со нелегални израелски населби беше една од главните теми на состанокот. Група земји, вклучувајќи ги Белгија, Холандија, Шпанија и Ирска, се обидуваат да обезбедат мнозинство за да ја принудат Комисијата да поднесе формален предлог за кој би можело да се гласа.

Високиот претставник на ЕУ за надворешни работи и безбедносна политика, Каја Калас, рече дека прашањето за нелегалните населби мора да се реши. Таа застана на страната на правната служба на Советот, но се спротивстави на Комисијата во однос на дефинирањето на мерките. Клучната разлика е што трговските мерки бараат само квалификувано мнозинство за усвојување, додека санкциите бараат едногласност од сите земји-членки.

Некои земји веќе презедоа мерки
Министрите од Холандија и Шпанија, исто така, повикаа на прекин на трговијата со населбите во цела ЕУ, истакнувајќи дека нивните земји веќе презеле билатерални чекори. „Шпанија веќе воведе билатерална забрана за таков увоз. Европската Унија мора да го стори истото“, рече шпанскиот министер за надворешни работи, Хозе Мануел Албарес Буено.