Израелскиот премиер, Бенјамин Нетанјаху, изјави дека во моментот не постои можност заложниците кои се уште ги држи палестинската милитантна група Хамас во Газа да се вратат дома.

Тој се сретна со семејствата на заложниците кои претходно ги ослободи Хамас, а како што пренесува „Ројтерс“, неколку членови на семејството кои присуствувале на состанокот жестоко ја критикувале израелската влада.

Една неименувана поранешна жена заложник, чиј сопруг сè уште е во заробеништво, го обвини Нетанјаху дека ја става политиката над преостанатите 138 заложници.

– Ја видов Арија Залмановиќ (85) како умира пред мене. И немаш што да кажеш за тоа, дека сакаш да го собориш режимот на Хамас? – таа рече.

Дани Миран, чиј син Омри беше земен како заложник од членовите на Хамас на 7 октомври заедно со околу 240 други Израелци и странци, рече дека почувствувал дека состанокот ја навредил неговата интелигенција и заминал среде средбата.

„Нема да навлегувам во детали за тоа што се разговараше на состанокот, но целиот овој настап беше грд, навредлив. Велат – ние направивме тоа и тоа, но лидерот на Хамас, Јахја Синвар го врати нашиот народ, а не тие“, рече тој и посочи дека владата направила фарса за прашањето за заложниците.

Нетанјаху рече дека „слушнал приказни што му го скршиле срцето, за сексуални напади и случаи на силување, за глад и жед“.

Состанокот се одржа во време кога продолжија борбите во Појасот Газа по седумдневна пауза во која беа вратени повеќе од 100 заложници од енклавата.