Израелскиот премиер Бенјамин Нетанјаху вчера им вети на Израелците дека ќе го засили „воениот притисок“ врз Хамас „во наредните денови“, не споменувајќи го нападот врз пренаселениот град Рафах во јужниот дел на Појасот Газа, за кој тој повеќе пати изјави дека е решен да го изврши. .

„Ќе му зададеме нови тешки удари и тоа ќе се случи наскоро. Во наредните денови ќе го зголемиме воениот и политичкиот притисок врз Хамас, бидејќи само така ќе ги ослободиме заложниците и ќе ја постигнеме нашата победа“, рече израелскиот премиер во видеото.

Нетанјаху вели дека е решен да изврши напад врз градот Рафах каде, според него, се концентрирани четири баталјони на палестинското исламистичко движење Хамас.

Но, невладините организации и се поголем број странски претставници се противат на оваа операција, стравувајќи дека ќе предизвика бројни цивилни жртви.

Израелската војска тврди дека некои од заложниците кои милитантите на Хамас ги киднапираа на 7 октомври за време на крвавиот напад на израелска територија се држат во Рафах.

Воен портпарол во неделата вечерта изјави дека „началникот на Генералштабот ги одобрил следните фази од војната“, без да наведе детали.