Маж кој тврди дека „работи за Газа“ држи неколку вработени како заложници во фабрика на американската групација Procter & Gamble (P&G) во предградијата на Истанбул, потврди локалната полиција.

Според турските медиуми, мажот е вооружен, додека синдикатот Умут Сен известува дека има седум вработени.

„Работниците се евакуирани од фабриката P&G во Гебза, седум работници останаа како заложници. Сопственикот е одговорен за нивната безбедност“, напиша синдикатот Умут-Сен во пораката преку мрежата Икс.

Фотографијата објавена во турските медиуми, која АФП не можеше да ја потврди, покажува маж со лицето делумно скриено со палестинска марама, со експлозив залепен околу телото и нешто што изгледа како мал пиштол во десната рака.

Слоганот нацртан со црвени букви на ѕидот зад него гласи „За Газа“.

Локалните медиуми, исто така, покажаа дека полициските автомобили го блокираат пристапот до фабриката која произведува производи за домаќинство и хигиена во источната периферија на Истанбул.

Турскиот претседател Реџеп Таип Ердоган, еден од лидерите кои најмногу го критикуваат Израел од почетокот на војната меѓу Израел и палестинското исламистичко движење Хамас, исто така ја осуди американската поддршка за Израел.

Имаше и бројни повици за бојкот на американските производи во Турција од почетокот на конфликтот во Газа. Неколку ресторани на Мекдоналдс и кафулиња Старбакс беа вандализирани низ целата земја.