Францускиот претседател Емануел Макрон денеска ја поздрави новата ера за Унгарија и за Европа, при приемот на новиот унгарски премиер Питер Маѓар во Елисејската палата.

„Со вас се отвора нова ера во Унгарија, но и за Унгарија во Европа. Вашиот избор ја покажа силната приврзаност на унгарскиот народ кон вредностите на Европската Унија“, изјави Макрон.

Питер Маѓар, кој победи на парламентарните избори во април, го победи поранешниот премиер Виктор Орбан, кого западните медиуми често го опишуваа како проруски ориентиран лидер кој блокирал дел од одлуките на ЕУ, вклучително и финансиската и воената поддршка за Украина.

„Унгарците чувствуваат пролетен ветер и ми е драго што и Европа го чувствува“, изјави Маѓар, кој веќе посетил неколку европски главни градови од преземањето на функцијата.

Унгарскиот премиер предложи зајакнување на соработката меѓу Франција, Германија и Вишеградската група (Полска, Унгарија, Словачка и Чешка), со идеја на состаноците да се приклучат и Франција и Германија.

Маѓар го покани Макрон во Будимпешта на 23 октомври, на 70-годишнината од унгарското востание од 1956 година против комунистичкиот режим и советското влијание.

Двајцата лидери најавија и јакнење на билатералните односи, со фокус на владеење на правото, борба против корупција и привлекување европски инвестиции.

Претседателката на Европската комисија, Урсула фон дер Лајен, најави деблокада на повеќе од 16 милијарди евра за Унгарија, кои биле замрзнати за време на владеењето на Орбан, под услов новата влада да спроведе реформи.

Франција и Унгарија, според Макрон, планираат ново стратешко партнерство кое треба да биде финализирано до крајот на годината и да опфати одбрана, нуклеарна енергија, индустрија, вселенски проекти, земјоделство, борба против дезинформации и заштита на демократијата.