Чеченскиот водач Рамзан Кадиров изјави дека неговиот син ја направил вистинската работа со тоа што претепал беспомошен човек во полициски притвор, но дека требало да оди до крај и да го убие. Сојузникот на Путин ја кажа горенаведената забелешка на денешната прес-конференција, пренесува Дејли Бист.

Тој призна дека и самиот бил изненаден што неговиот 16-годишен син Адам не бил кривично гонет за тепањето. Во септември, Кадиров сподели видео од неговиот тогаш 15-годишен син Адам како напаѓа човек обвинет за палење на Куранот, пофалувајќи го дека „се однесува како вистински маж“.

„Отпрвин мислев дека ќе биде казнет“, изјави денеска Кадиров, истакнувајќи дека стравува од долга затворска казна за неговиот син. Потоа забележал дека воопшто нема причина да го казни. Полицијата во Грозни, главниот град на Чеченија, го затвори случајот против Адам Кадиров со образложение дека е малолетник.

„За што да го казнат? За тепање? Добро би било да го убие“, рече Кадиров. Тепањето наиде на осуда низ целиот свет, при што некои повикаа на истрага за кршење на човековите права во Чеченија.

Меѓутоа, Адам потоа бил великодушно награден со низа награди и должности. Тој ја доби титулата Херој на Чеченската Република, стана шеф на обезбедувањето на неговиот татко и беше назначен во стрелачки вод во руското Министерство за одбрана.