Поранешниот претседател на Европската комисија, Жан-Клод Јункер, оцени дека Украина не треба да дава конкретни ветувања за прием во Европската Унија и предупреди на опасноста од ставање на земјите од Западен Балкан во неповолна положба.

„Мораме да се осигураме дека нема јаз во емоционалното доживување на ситуацијата, дека ќе кажеме „да“ за приемот на Украина и дека земјите од Западен Балкан ќе продолжат да бидат предмет на правилата за пристапување на ЕУ“, изјави Јункер за германската телевизија „Феникс“.

Јункер рече дека ниту една од овие земји не ги исполнува условите за прием, нагласувајќи дека ова важи и за Украина, објави денес луксембуршкиот весник „Луксембургер ворт“.

„Немам добро мислење за давањето на Украина конкретен датум за пристапување. Како по правило, тоа се враќа како бумеранг“, рече Јункер, кој беше премиер на Луксембург речиси дваесет години пред да ја преземе функцијата во Брисел.

Тој додаде дека ЕУ мора јасно да ѝ стави до знаење на Украина дека има европска перспектива.

Сепак, Јункер оцени дека, без оглед на моменталните околности, не смее да има никаква премија за Украина и дека и таа мора да ги исполни правилата за пристапување од Копенхаген и дека ова важи и за сите други земји.

Според него, Европската Унија мора „ригорозно“ да обезбеди исполнување на условите за пристапување, бидејќи во спротивно може да има „длабоки поделби“ по влегувањето на кандидат во ЕУ.

Јункер рече дека зборува од искуство и ги наведе Романија, Бугарија и Хрватска како примери.

Запрашан за ефикасноста на донесувањето одлуки со консензус во ЕУ во некои политики, Јункер оцени дека Брисел ќе мора да се движи во насока на квалификувано, или во некои прашања „суперквалификувано“ мнозинство при донесувањето одлуки.