Војската на Израел денеска соопшти дека уништила командно-контролен центар што го користела единица на Хамас во градот Газа. За време на операцијата во областа Шеџаја, која се смета за едно од последните упоришта на Хамас во Појасот Газа, војниците убиле голем број милитанти.

Уништен е и комплекс од тунели, соопштија израелските одбранбени сили (ИДФ). Германската новинска агенција дпа пишува дека не е можно самостојно да се потврди оваа информација.

Пред неколку дена израелскиот министер за одбрана Јоав Галант објави дека командниот центар на Хамас во Шеџаја е опколен. Израел проценува дека палестинското екстремистичко движење има вкупно 24 баталјони, секој со околу 1.000 членови.

Израелската армија денеска додаде дека убила неколку милитанти во Хан Јунис, на југот на Појасот Газа. Во тунелот откриен во тој град, војниците наводно ги пронашле моторите користени во нападот на 7 октомври.

Хамас е одговорен за масакрот на 7 октомври во јужен Израел, кој го означи почетокот на војната во Газа. Над 1.200 луѓе во Израел беа убиени, главно цивили. Нападите на Израел врз Газа беа под зголемена меѓународна критика во последните неколку недели, додека бројот на загинати меѓу палестинските цивили продолжува да расте.

Над 18.000 се убиени во Газа, според палестинските власти под контрола на Хамас.