Израелското Министерство за надворешни работи ја осуди денешната одлука на Словенија за признавање на независна палестинска држава.

Министерот за надворешни работи Израел Кац рече дека одлуката, која ќе оди на одобрување во словенечкиот парламент, е награда за Хамас за убиства и силувања. Во изјавата Кац вели дека овој потег го зајакнува и Иран, непријателот на Израел и му штети на „блиското пријателство на словенечкиот и израелскиот народ“.

„Се надевам дека словенечкиот парламент ќе ја отфрли оваа препорака“, додаде тој.

Словенечката влада претходно денеска објави дека им се придружува на европските земји кои ја признаваат палестинската државност.

Премиерот Роберт Голоб рече дека неговата влада се согласила со одлуката за признавање на Палестина и најверојатно ќе ја достави мерката до парламентот на конечно одобрување следната недела, објави новинската агенција СТА.

Словенија го следи патот на Ирска, Норвешка и Шпанија. Тие земји официјално ја признаа независна Палестина претходно оваа недела. Шведска го направи тоа пред десет години.

Повеќе од 140 од 193 земји-членки на Обединетите нации ја признаваат Палестина како суверена држава. Западноевропските земји и САД долго време беа исклучок.