– Германската Влада денеска соопшти дека подготвува нов пакет воена помош за Украина во вредност од 2,7 милијарди евра, вклучувајќи и испорака на бројни тенкови, оклопни возила и системи за противвоздушна одбрана.

– Сите ние сакаме брз крај на оваа ужасна војна на Русија против украинскиот народ, но за жал тоа не е на повидок. Затоа Германија ќе ја пружи сета помош што може сè додека тоа е неопходно, изјави германскиот министер за одбрана Борис Писториус во соопштение.

Се подготвува испорака на, меѓу другото, дополнителни 30 тенкови А5 Леопард-1, 20 нови оклопни возила од типот Мардер и повеќе од 100 други помали оклопни возила, 200 дронови за набљудување, четири нови системи за противвоздушна одбрана Ирис-Т и нивните платформи за лансирање, бројни ракети за противвоздушна одбрана, 18 пиштоли – хаубици и муниција.

Германската Влада минатата година му додели две милијарди евра воена поддршка на Киев. За годинава досега е планирана помош од 2,2 милијарди евра.