Иранскиот претседател Ебрахим Раиси денеска назначи генерал на Револуционерната гарда за нов секретар на Врховниот совет за национална безбедност.

– Али Акбар Ахмадијан со претседателска уредба е назначен за секретар на Врховниот совет за национална безбедност, се вели во соопштението објавено на веб-страницата на иранското Претседателство.

Ахмадијан го замени Али Шамкани, кој долго време беше на оваа функција и кој придонесе за зближување со арапските земји од Заливот.

Врховниот совет за национална безбедност е одговорен за дефинирање на одбранбената и безбедносната политика на земјата и за одбрана на нејзините национални интереси.

Одлуките на Советот мора да бидат потврдени од иранскиот врховен лидер, ајатолахот Али Хамнеи.