Еден новинар загина, а шестмина се ранети кога израелски проектил падна врз група меѓународни новинари кои известуваа за судирите на границата на Израел со јужен Либан.

Новинарот на АП на лице место го видел телото на загинатиот новинар и уште шестмина ранети, од кои некои со возило на брза помош биле пренесени во болниците. На снимката од местото на настанот се гледа изгорено возило.

Новинар на Франс прес од местото на настанот претходно објави дека неколку новинари се ранети вечерва во израелски напад врз јужен Либан. Тој рече дека ракети паднале врз секторот каде што се наоѓала група новинари од најмалку три различни медиуми во пограничното село Алма ал Шаб.

Артилерискиот оган се случил за време на размена на оган долж либанско-израелската граница меѓу израелската армија и членовите на либанската милитантна група Хезболах.

На либанско-израелската граница има спорадична размена на оган по саботниот напад на милитантната палестинска група Хамас на југот на Израел, од Појасот Газа.

Катарската телевизија Ал Џезира објави дека двајца нејзини новинари, Ели Бракја и Кармен Џукадер, се меѓу ранетите. АП не наведува други медиуми чии новинари се убиени или ранети додека тие медиуми самите не издадат јавни изјави за тоа.

Новинари од целиот свет пристигнуваат во Либан, каде што се стравува дека би можело да избие војна меѓу Хезболах и Израел.