Неверојатно силниот Ел Нињо, кој моментално ја загрева планетата, го сруши историскиот температурен рекорд за овој природен феномен, неколку месеци пред да се очекува неговиот врв, пишува „Гардијан“.

Најновите мерења покажуваат дека зголемувањето на температурата во самиот центар на Ел Нињо во Тихиот Океан достигна 3,05°C. Ова го надминува претходниот апсолутен рекорд од 3,02°C забележан на крајот на ноември 2015 година, што беше највисокото ниво измерено во последните 150 години современи мерења. Оваа температура се пресметува во однос на просекот за периодот од 1991 до 2020 година.

Повеќето метеоролози користат 30-годишен подвижен просек како почетна точка, кој го зема предвид глобалното затоплување предизвикано од човекот.

Најновите проценки предвидуваат дека врвот во ноември и декември би можел да достигне и до 4,0°C, според просекот на 14 различни модели на прогноза анализирани од климатскиот научник Зик Хаусфадер.

Бројките се такви што Хаусфадер ги нарече зачудувачки, додека други експерти веќе зборуваат за феномен на „ниво на Годзила“. Секое зголемување на температурата поголемо од 0,5°C се смета за Ел Нињо, додека вредностите над 2°C официјално се класифицираат како „многу силен“ или „супер“ Ел Нињо.

Сегашниот Ел Нињо веројатно ќе биде најсилниот ваков настан во последните најмалку 1.000 години. Ќе испумпа огромна количина дополнителна топлина во атмосферата која веќе брзо се затоплува поради согорувањето на фосилните горива. Се очекува двојниот удар да ја направи 2027 година најтопла година досега.

Климатската криза предизвикана од загадувањето со фосилни горива веќе ги влошува екстремните временски услови и одзема животи. Нов Ел Нињо ќе ги влоши овие ефекти, а промените во временските услови веќе почнуваат да влијаат на планетата.

„Екстремно силните настани на Ел Нињо, како оние во 1997/1998 и 2015/2016 година, предизвикаа стотици милијарди долари штета низ целиот свет. Овој ги остава минатите далеку зад себе“, предупредува Хаусфадер во анализа за Carbon Brief.

Професорката Фридерике Ото од Империјал колеџ во Лондон истакнува дека ова е огромна промена на енергијата во рамките на климатскиот систем: „Ова е опасно затоа што се случува врз веќе затоплен климатски систем кој е под влијание на луѓето. Поради ова, на многу места во светот ќе видиме невидени екстремни температури, со сите нивни последици за здравјето, безбедноста на храната и недостигот на вода. Ел Нињо доаѓа и си оди, но сè додека трошиме фосилни горива, тој се случува на сè потопла основа, па заедниците имаат многу потешко справување со последиците.“

Жештината и сушата во Индонезија веќе предизвикаа рекордни шумски пожари и опасно загадување на воздухот, додека Индија ги пропушти клучните монсунски дождови. Сушата во Централна Америка и Карибите ги уништува посевите и го забавува поморскиот сообраќај поради падот на нивото на водата во Панамскиот канал. Светската програма за храна предупреди во август дека ефектите од Ел Нињо би можеле да доведат околу 50 милиони луѓе во акутен глад и да предизвикаат нов пораст на цените на храната.

Годините доминирани од Ел Нињо носат значително пообилни дождови и поплави во некои делови од светот. Перу и Чиле веќе ги трпат последиците, а пристапот до Мачу Пикчу е прекинат. Африканскиот рог е исклучително ранлив на зголемени поројни дождови, додека обилни врнежи се очекуваат во јужниот дел на САД во текот на зимата.

Летото на јужната хемисфера ќе биде значително потопло и посуво, што носи поголем ризик од пожари и суши во Австралија и јужна Африка. Посилни тајфуни се очекуваат и во Пацификот, додека Ел Нињо, од друга страна, обично ги забавува ураганите во Атлантикот, каде што, невообичаено, оваа година не се регистрирани урагани.

Генералниот секретар на ОН, Антонио Гутереш, изјави дека планетата влегува во непозната област и опасна зона на временски екстреми.

Професорот Бил Мекгваер за „Гардијан“ нагласи дека ова би можело да биде една од најголемите временски промени во последните илјада години што ќе донесе низа катастрофи, потсетувајќи дека супер Ел Нињо од 1997 и 1998 година донесе загуби од 5,7 трилиони долари за светската економија.

„Сите последици од Ел Нињо се засилени од глобалните климатски промени“, заклучува професорот Кевин Тренберт од Националниот центар за атмосферски истражувања на САД. „Невидените топлотни бранови и шумски пожари што ги видовме во Европа, Северна Америка и Азија се само мала вовед за она што доаѓа.“