Чешкиот премиер Андреј Бабиш денес изјави дека Чешка го почитува принципот на колективна одбрана во НАТО и дека, на пример, ако Полска биде нападната, НАТО сигурно ќе ѝ дојде на помош согласно член 5 од Договорот.

Чешкиот претседател Петр Павел, кој престојува во Њујорк, ја пофали владата по изјавата на Бабиш за решително застапување на колективната одбрана, а реагираше и на фактот дека словачкиот премиер Фицо го обвини дека, бидејќи Павел е пензиониран генерал, сака да оди во војна.

„Веќе слушнав слични аргументи. Дека генералот е тој што ја влече земјата во војна, додека другите сакаат мир. Мирот нема да дојде кај оној што се преправа дека го сака, но не е спремен да направи ништо за него. НАТО нема да функционира ако не сме подготвени да жртвуваме нешто за безбедноста на другите“, изјави Павел за чешките медиуми во Њујорк.

Чешкиот претседател предупреди дека ваквите изјави што го оспоруваат Член 5 за колективна одбрана се опасни во сегашната безбедносна ситуација, а додаде и дека е опасно кога некои го повторуваат и шират рускиот наратив под маската на патриотизам.

„Ако денес некој го поддржува рускиот наратив, кој е доста објективно изопачен и нè наведува да престанеме да им веруваме на нашите институции и сојузници, тогаш ова апсолутно оди против нашите национални интереси“, рече Павел.

Чешкиот претседател додаде дека некој можеби се крие зад патриотизмот, но ако ги стави интересите на Русија пред интересите на својата земја, тогаш сигурно не може да биде патриот.

Петр Павел потсети дека словачкиот претседател Петер Пелегрини, кој ја критикуваше изјавата на Фицо во неделата, го гледа НАТО и односите со сојузниците многу слично на чешкиот претседател.