Бројот на жртви во пожарот што избувна во станбениот комплекс Ванг Фук Корт во Хонг Конг минатата среда се искачи на 156, а жителите на единствената зграда што не беше погодена од пожарот ќе можат да се вратат во своите домови за кратко време утре и четврток за да соберат лични работи, објавија денес властите.

Полицијата објави дека се пронајдени уште пет тела, со што бројот на жртви се зголеми од 151 на 156, а од вкупниот број жртви, идентификувани се 127, објави порталот SCMP.

Жителите на зградата што не беше погодена од пожарот ќе можат да ги земат своите работи во рок од еден и пол час, во придружба на полицајци, државни службеници и социјални работници.

Лидерот на Хонг Конг, Џон Ли Ка-чиу, претходно нареди формирање независен комитет за да ги разгледа околностите на пожарот што зафати седум згради во населбата Таи По минатата среда.

Комисијата, со која претседава судија, ќе биде задолжена да ги утврди причините за брзото ширење на пожарот и да предложи системски реформи за спречување на слични трагедии во иднина.

Ли наведе осум клучни области за итна проверка, вклучувајќи безбедносни стандарди, надзор и одржување на градежните работи, судир на интереси во процесот на градење, корупција и неправилности во тендерите, како и надзор на системите за противпожарна заштита во зградите.

Комисијата, исто така, ќе предложи можни измени и казни во постојниот закон.

Фото: ЕПА