Екипажот на јахта во сопственост на Марк Цукерберг вели дека не слушнале радио повик за помош од мал брод на кој му снемало гориво покрај брегот на Алјаска. Портпаролот на извршниот директор на Мета изјавил дека до моментот кога го примиле повикот, друг брод во близина веќе обезбедил помош, според „Гардијан“.

Локалниот медиум „Alaska Beacon“ објави дека бродот побарал помош преку крајбрежната стража на САД минатата недела. Помал крузер „Wilderness Legacy“ кој се наоѓал во близина го одвлекол бродот до заливот Фарагут во југоисточна Алјаска и го наполнил со гориво.

Јахтата на Цукерберг, „Launchpad“, иако била поблиску, не одговорила на повикот. Портпаролот му објаснил на „Alaska Beacon“ во е-пошта вчера зошто екипажот на „Launchpad“ првично не го слушнал повикот. „Марк и неговото семејство не биле на бродот во времето на инцидентот“.

Како што утврди крајбрежната стража, бродот не бил во непосредна опасност. Додека екипажот ја проверил комуникацијата со крајбрежната стража на друг канал, операцијата за спасување веќе била започната. Драго ни е што сите се безбедни, рече тој.

Еден од патниците од крузерот претходно ја објави својата верзија на настанот на социјалните мрежи. Тој опиша како неговиот брод отишол да му помогне на пловилото и тврдеше дека властите ја контактирале јахтата на Цукерберг преку радио, но дека нејзиниот екипаж „неколку пати одбил да одговори“.