Високиот претставник на ЕУ за надворешна политика и безбедност Жозеп Борел денеска изјави дека Блискиот Исток стои „на работ на бездната“ и повика на деескалација на конфликтот меѓу Израел и Иран.

„Ние сме на работ на пропаст и мораме да се оддалечиме од неа. Мораме да притиснеме на сопирачките и да се вратиме наназад“, изјави тој за шпанското радио „Onda Cero“.

Борел наведува дека очекувал одговор од Израел на иранскиот воздушен напад, но се надева дека тоа нема да предизвика дополнителна ескалација.

Тој оцени дека „можеби некому му е во интерес“ избувнувањето на поширока регионална војна на Блискиот Исток, што би го оневозможило запирањето на воените операции во Појасот Газа, пренесува Танјуг.

Иран лансираше стотици беспилотни летала и проектили кон Израел во саботата вечерта, како одговор на израелскиот напад врз иранскиот конзулат во Дамаск, во кој загинаа седум офицери на Иранската револуционерна гарда, вклучително и двајца високи команданти.