Белата куќа соопшти дека извештаите на иранските медиуми за можен меморандум за разбирање за завршување на војната се „неточни и целосна измислица“.

„Овој извештај на медиумите контролирани од Иран не е вистинит, а Меморандумот за разбирање што го објавија е целосна измислица. Никој не треба да верува во она што го објавуваат иранските државни медиуми. Фактите се важни“, беше објавено на официјалниот профил на Белата куќа на мрежата Икс.

Одделно, портпаролката на Белата куќа, Оливија Велс, го повтори тврдењето на американскиот претседател Доналд Трамп дека преговорите меѓу двете страни напредуваат добро.

Иранската државна телевизија денес објави дека Техеран добил нацрт на почетна, неофицијална рамка за меморандум за разбирање со Соединетите Американски Држави за завршување на нивниот конфликт. Според документот, Иран ќе го врати комерцијалниот превоз низ Ормускиот теснец на нивоата пред војната во рок од еден месец, додека Соединетите Американски Држави ќе ги повлечат воените сили од близина на Иран и ќе ја укинат својата поморска блокада.

Државната телевизија соопшти дека рамката, која ги исклучува воените бродови и предвидува дека Иран ќе го управува сообраќајот низ теснецот во соработка со Оман, сè уште не е завршена и дека Техеран нема да преземе никакви чекори без „опиплива верификација“. Додаде дека конечниот договор, доколку се постигне во рок од 60 дена, би можел да биде одобрен како обврзувачка резолуција од страна на Советот за безбедност на ООН.