Американскиот претседател Џозеф Бајден изјави дека има комплексни односи со израелскиот премиер и пријател Бенјамин Нетанјаху и дека двајцата имале несогласувања и порано, но и денес.

Говорејќи на приемот во Белата куќа по повод еврејскиот фестивал Ханука, Бајден потсети на своето повеќедецениско пријателство со Нетанјаху, објави Ројтерс.

Тој рече дека напишал порака на стара фотографија од двајцата: „Биби, те сакам, но не се согласувам со проклет збор што имаш да го кажеш“.

„И денеска е отприлика така“, рече Бајден и доби аплауз од стотина гости, главно со еврејско потекло, додавајќи дека Израел денеска се наоѓа на незгодно место и дека имал несогласувања со израелските лидери.

Тој не објасни кои се разликите, иако двајцата разговараа за различни прашања во последните недели, почнувајќи од војната против Хамас до третманот на Палестинците. Бајден им рече на Евреите во Белата куќа кои го славеа Ханука дека и покрај разликите во ставовите со израелските лидери, неговата посветеност на независна еврејска држава е непоколеблива.

„Луѓе, да го немаше Израел, ниту еден Евреин во светот немаше да биде безбеден“, рече Бајден.

Критикуван дека го поддржува израелскиот напад врз Појасот Газа по смртоносниот напад на Хамас на 7 октомври во кој загинаа 1.200 луѓе во јужен Израел и беа киднапирани околу 240, Бајден рече дека поддршката за Израел ќе продолжи се додека Хамас не биде отстранет.

Но, тој предупреди дека јавното мислење може сериозно да ја наруши безбедноста на Израел.

„Мораме да бидеме внимателни. Мора да бидат внимателни. Светското мислење може да се промени преку ноќ. Не смееме да дозволиме тоа да се случи. САД ќе продолжат да работат на ослободување на заложниците од Газа, за забрзување на испораката на хуманитарна помош за Палестинците. На нашите израелски пријатели им нагласувам дека мораме да ги заштитиме животите на цивилите“, рече Бајден.