Позицијата на Австрија во однос на поддршката за Украина останува непроменета – републиката, во согласност со нејзиниот неутрален статус, нема да учествува во испораката на оружје за Киев, изјави австрискиот министер за надворешни работи Александар Шаленберг, коментирајќи ги плановите на ЕУ да собере дополнителни 20 милијарди евра од земјите-членки за воена помош Украина.

„Не станува збор за воена помош, туку за Европскиот мировен фонд, кој сепак сакаат да го зајакнат“, изјави Шаленберг за новинарите на неформалниот состанок на министрите за надворешни работи на ЕУ во Толедо, Шпанија, пренесува „РИА Новости“.

„Европската унија е подготвена да продолжи да работи за Украина. Но, од гледна точка на Австрија, би сакал многу јасно да кажам дека нашата линија е непроменета. Нам ни е јасно дека нема да доставуваме оружје или да финансираме набавка на оружје. Тоа нема да се промени, тоа е нашиот неутрален статус“, нагласи Шаленберг.

Во исто време, Австрија продолжува да ги осудува руските акции во Украина.

„Ќе биде потребно многу трпение, ќе продолжиме да ја поддржуваме Украина, но дали овие 20 милијарди евра се навистина неопходни и како ќе бидат потрошени, останува да се разговара“, заклучи министерот.

Шефот на дипломатијата на ЕУ, Жозеп Борел, претходно изјави дека очекува да се договори со земјите од ЕУ за годишно доделување до пет милијарди евра годишно од Европскиот мировен фонд за воена помош за Украина во следните четири години.