Шпанската лига ќе пријави расистички скандирања упатени кон играчот на Реал Мадрид Винисиус Жуниор пред натпреварот на Атлетико Мадрид во Лигата на шампионите против Интер.

Винисиус, на социјалните мрежи сподели видео на кое се слушаат навивачите на Атлетико како скокаат и извикуваат „Шимпанзо Винисиус“, пред стадионот „Сивитас Метрополитано“.

Бразилскиот фудбалер побара реакција од институциите, а на социјалната мрежа „Х“ напиша: „Се надевам дека веќе размислувавте за нивната казна“.

На таа објава тој ги означи профилите на Европската фудбалска унија (УЕФА) и Лигата на шампионите.

„Тоа е тажна реалност бидејќи се случува и на натпревари на кои не присуствувам“, додаде Винисиус.

Шпанската лига соопшти дека ќе ги пријави инцидентите до обвинителството за злосторства од омраза и дека ќе преземе мерки и покрај тоа што скандирањата се случуваат на натпревар кој не е во нејзина организација и надвор од стадионот.

Ла Лига изјави дека е целосно посветена фудбалот да биде место без омраза и немилосрдно ќе продолжи да ги гони сите дела на расизам, хомофобија, насилство и омраза, без оглед на конкуренцијата.

Имаше и наводи за скандирање против Винисиус пред натпреварот во вторникот од Лигата на шампионите меѓу Барселона и Наполи.

„Кадена Сер“, објави видео на кое навивачите на Барселона извикуваат „Смрт за Винисиус“ пред нивната победа од 3:1 против Наполи. Слични скандирања се слушаат и на другите дерби натпревари меѓу двата клуба.

Винисиус е мета на расистички навреди откако дојде во Шпанија пред шест години. Навивачите често го навредуваат поради бојата на кожата, го нарекуваат мајмун, а минатата година симпатизерите на Атлетико закачија кукла со неговиот лик на еден мост во Мадрид, пред дербито во Копа дел Реј.

На 26 март Шпанија и Бразил ќе одиграат пријателски натпревар на стадионот на Реал како дел од заедничката борба против расизмот.