Црногорскиот стопер Стефан Савиќ (32) по осум успешни години е пред заминување од Атлетико. Поранешниот играч на Партизан, Манчестер сити и Фиорентина оваа сезона падна во втор план кај тренерот Чоло Симеоне и одигра само 972 минути во сите натпреварувања.

Турските медиуми пишуваат дека Фенербахче инсистира на трансферот на официјално најдобриот црногордки фудббалер во 2023 година.

Дека Атлетико е подготвен да се раздели со Савиќ покажува и податокот дека клубот за него нема да бара обесштетување.

Договорот на Савиќ истекува на лето, но во договорот има клаузула дека договорот автоматски ќе биде продолжен на уште една година доколку одигра најмалку 20 натпревари во тековната сезона. Савиќ досега настапил на 13 натпревари, а бидејќи клубот не планира да го задржи, веќе во јануари се подготвени бесплатно да се ослободат од него. Со тоа во буџетот за плати клубот би ослободил 4,5 милиони евра.

Турските медиуми пишуваат дека Црногорецот би прифатил да се пресели во Истанбул доколку добие тригодишен договор вреден најмалку 3,5 милиони евра по сезона.

Наводно од Фенербахче му дале задача на Един Џеко да го убеди Савиќ да дојде во Турција. Савиќ го освои шпанското првенство со Атлетико и играше едно финале во Лигата на шампионите.