Претседателот на Собранието на Република Северна Македонија, Талат Џафери, денеска на средба со специјалниот пратеник на претседателот на Азербејџан, Ечин Амербајев, од име на Собранието и лично, упатил поздрави до азербејџанскиот претседател Илхам Алиев и до неговиот хомолог, претседателката на Парламентот на Азербејџан, Сахиба Гафарова.
Тој се заблагодарил за нејзината покана да го посети Азербејџан во наредниот период.
Како што соопштија од собраниската прес-служба, претседателот Џафери изразил уверување дека во наредниот период заедно со Азербејџан ќе се работи на зајакнувањето и интензивирањето на билатералната комуникација, како со средби на највисоко ниво, така и на парламентарните групи за соработка на двете земји.
– Притоа, тој ги потенцираше можностите за зголемување на економско-трговската соработка која се уште е на незадоволително ниво иако има голем потенцијал за подобрување. Ја искажа нашата заинтересираност како држава за соработка на полето на енергетиката и приклучување кон ТАП-Транс-Јадранскиот гасовод, за што имаме силна поддршка и од ЕУ. „Во рамките на нашето претседавање со ОБСЕ оваа година, истакна претседателот Џафери, го поддржуваме мирното решавање на конфликтот меѓу Азербејџан и Ерменија во регионот на Нагорно Карабах и надминувањето на блокадите на Коридорот ,,Лачин“, се наведува во соопштението.
Специјалниот пратеник на претседателот на Азербејџан, Амербајев, кој е во прва посета на нашата земја, се заблагодарил за можноста да биде гостин во Собранието на Република Северна Македонија и ги пренел поздравите од претседателот Илхам Алиев до нашата земја и до Собранието.
Тој нагласил дека неговата агенда е во насока на давање придонес кон зајакнувањето и интензивирањето на пријателските односи меѓу двете земји, како и подетално запознавање на претседателот Џафери со безбедносната ситуација во неговата земја и тековните преговори меѓу Азербејџан и Ерменија, за ставање крај на долгогодишниот конфликт меѓу двете земји со постигнатата согласност околу точките на мировниот процес и очекувањата од неговото имплементирање.
– Целосно се согласи со претседателот Џафери дека во наредниот период треба да се вложат заеднички напори за зајакнување на соработката на сите полиња, особено на економски план и на планот на развој на авиосообраќајот и туризмот меѓу двете страни. Се осврна и на значењето кое го има Западен Балкан за Азербејџан на полето на енергетската поврзаност со гасоводните коридори кои поминуваат низ повеќе земји, стои во соопштението од собраниската прес-служба.
