Со инвестиција од буџетот на Општина Аеродром и завршување на градежните активности кои се одвиваа изминатиот период, градинката „Пчелка 2“ во населбата Лисиче доби целосно нова енергетски-ефикасна фасада, известува општина Аеродром.

Увид во реализираниот проект изврши градоначалникот Тимчо Муцунски, кој истакна дека со оваа инвестиција, значително се подобруваат условите за згрижување на децата и средината во која растат, но и се придонесува кон заштеда на електрична енергија и финансиски средства кои ќе бидат пренаменети за други проекти во областа на образованието и социјалната заштита.

„Се радувам кога ја гледам реализацијата на инвестиции и проекти кои обезбедуваат одржливост и градат поубава средина за раст и развој на најмладите аеродромци. Во првите две години од мандатот се посветивме на решавање на сите инфраструктурни предизвици кои се поврзани со најмладите, затоа што Аеродром е општина што инвестира и креира подобри услови за нив“, напиша Муцунски на својот Фејсбук профил.