Надлежното Јавно обвинителство да постапи и да ги истражи сомнителните јавни набавки со астрономски цени во општините под капа на ДПМНЕ, велат од СДСМ.

„Новата афера на градоначалниците на ДПМНЕ кои купувале неколкупати поскапи машини од реалната цена мора да се расчисти. Според јавно достапни документи општина Битола за речиси 50.000 евра набавила машина за бележење хоризонтална сигнализација. Иста машина набавила општина Велес по цена од 40.000 евра“, додаваат од СДСМ.

Според СДСМ, овие цени се 3 до 5 пати повисоки од реалните.

„Општина Илинден и многу други општини набавиле таква машина по три пати пониска цена од астрономските, кои се платени во општините Велес и Битола. Прашањето е во чии џебови завршила разликата? Одговорност за злоупотреба на парите на граѓаните мора да има“, завршуваат од владејачката партија.