Во тек е внатрешно уредување на спортска сала, информираше, кумановскиот градоначалник Максим Димитриевски.

-Завршивме со подготовка за поставување на епоксидни подови во нашата спортска сала во Куманово. Одиме фаза по фаза до целосна реконструкција, објави Димитриевски.

Реконструкцијата на трибините во спортската сала во Куманово, почна лани во август. Тогаш за реконструкцијата на внатрешноста во салата Куманово, општината одвои над 12 милиони денари.

Кон крајот на декември, 2021 заврши пак санацијата на кровната конструкција на спортската сала која се спроведуваше преку проект од програмата за регионален развој на Министерството за локална самоуправа и Бирото за рамномерен регионален развој од 2020 година со учество на општина Куманово. За проектот беше потпишан договор за градба, средствата во вредност од 23 милиони 430 илјади денари беа обезбедени преку програмата, а општината учествува со 830.000 денари, соопштија тогаш надлежните од Центарот за развој на североисточниот плански регион.

Кумановскиот градоначалник, претходно информираше дека спортската сала ќе се реконструира постепено во неколку фази, согласно обезбедените средства. Спортската сала е еден од четирите големи спортски објекти, Соколана, градски стадион и стрелиште кои Владата ѝ ги врати во владение на општина Куманово.