Секторот за внатрешни работи Тетово вчера започна со практична имплементација на нов превентивно-едукативен проект „Чекор по чекор“, чиј носител е Отсекот за превенција.

Во текот на вчерашниот, прв ден од реализацијата на овој проект биле опфатени 70-тина деца од две детски градинки во Тетово и тетовско Џепчиште. Инаку, со проектот кој се планира да трае до крајот на јуни годинава вкупно се планира да се опфатат над триесет градинки и други детски установи на тетовско-гостиварското подрачје.

-Најмладите, децата, стручно обучени полициски службеници на тетовската Полициска станица за безбедност на патниот сообраќај непосредно ги запознаваат со основните сообраќајни поими, знаци и правила-како најбезбедно да се движат, што претставуваат семафорите и како и каде да ги преминуваат улиците кога се сами без нивните родители или најблиски. Покрај ова, на децата практично им се демонстрира и безбедно преминување на улица, за што се користат и посебни наменски реквизити и друга адекватна опрема. Целта на овој превентивно-едукативен проект е подигнување на сообраќајната свест и култура на децата уште од најмали нозе, во функција на нивна поголема безбедност како пешаци-учесници во сообраќајот или како сопатници во возилата, вели портпаролот Марјан Јосифоски.

На децата им се делат и посебни брошури „Правила за малите пешаци“ изработени на македонски и албански јазик. Вакви и слични превентивни активности планирани се во наредните месеци и со основците од тетовските и гостиварските училишта.