Министерството за здравство во координација со Универзитетскиот институт за радиологија информира дека е во тек сервисирање на апаратите за компјутерска томографија, кои се во дефект и се прават напори за нивно што побрзо ставање во функција.
Оттука велат дека уште од почетокот на оваа недела е направена реорганизација за упатување на пациентите, со цел навремено добивање на потребната здравствена услуга.
„За обезбедување континуитет на здравствената заштита, непречено згрижување на итните пациенти и навремена КТ дијагностика и до нивно повторно ставање во функција пациентите се згрижени, односно снимањата се вршат во ГОБ „8-ми Септември“ и Хируршката клиника „Св. Наум Охридски“ во Скопје“, велат од Здравство.
Се додава дека здравјето и безбедноста на пациентите се приоритет. Затоа, до повторното ставање во функција на апаратите, пациентите упатени за компјутерска томографија се примаат и снимаат според следната динамика:
ЈЗУ ГОБ „8-ми Септември“, оддел за дијагностичка и интервентна радиологија
од 08:00 до 14:00 часот
од 20:00 до 02:00 часот
ЈЗУ Клиника за хируршки болести „Св. Наум Охридски“ – Скопје
од 14:00 до 20:00 часот
од 02:00 до 08:00 часот
„Организацијата е времена и ќе се применува само додека апаратите на Универзитетскиот институт за радиологија не се вратат во функција. Ги молиме пациентите и лекарите доследно да ја почитуваат наведената временска динамика.
За секоја промена на состојбата, како и за повторно воспоставување на редовниот режим на работа, сите релевантни здравствени установи, служби и јавноста ќе бидат навремено информирани.
Министерство за здравство вложува максимални напори за што побрзо ставање во функција на оваа апаратура, со целосна посветеност кон непрекинато обезбедување квалитетна здравствена заштита, а дополнително се прават напори за обезбедување термини и во други соодветни јавни здравствени установи.
Апелираме оваа тема да не се користи за дневнополитички цели, особено што овој сегмент во системот е веќе реорганизиран и пациентите ја добиваат потребната здравствена услуга“, се додава во информацијата од Министерството за здравство.
