Секое утро добивам извештај од сметката за изборната кампања, и иако приливот со донации на граѓани е скромен, останувам длабоко трогната кога ќе видам донации од 200, 500, 1000 денари, изјави кандидатката за претседателка на државата, Билјана Ванковска, од политичката партија Левица.

Ванковска рече дека секој дава колку што може, а најважно , на оние кои донирале не им било тешко да отидат во банка и да уплатат од срце и кога никој не ги притиска.

„Водам најскромна можна кампања ама чекорам со обичен и сиромашен ама чесен свет! Благословена сум со вашата верба и грижа. Ви благодарам прекрасни луѓе (најчесто непознати)“, напиша Ванковска на социјалните мрежи.

Според извештајот што пред неколку дена го објави Државниот завод за ревизија, граѓаните индиректно преку Буџетот се најголеми финансиери на партите. Помал дел од средствата доаѓаат од членарина, подароци, донации и други извори.