Пратеникот на СДСМ, Дарко Каевски, на прес-конференција рече дека Мицкоски делува антиевропски и дека и штети на Македонија.

„Обидот за блокада на членството во ЕУ е обид за загрозување на македонската иднина. Блокада на европскиот пат ќе значи 11 загубени години во изолација, загубени 10 милијарди евра од европските фондови и неизвесна иднина. Прескапа цена е тоа за нас како држава но и како народ и тоа не смее да се случи.Се одвоивме од Хрватска и заостанавме 17 години во чекалната. Ако се одвоиме од Албанија, Црна Гора и Србија, никој не гарантира дали некогаш ќе биде можно да станеме земја членка на ЕУ“, вели Каевски.

Според него, целосна европска интеграција не е само стратешка цел, членство во ЕУ е нашата единствена алтернатива и желба на граѓаните заради подобар живот.

„Македонските граѓани сакаат да живеат во ЕУ затоа што тоа значи подобар животен стандард, подобра инфраструктура, економски напредок, социјална правда, врвна демократија, подобро владеење на правото. Граѓаните сакаат децата да им останат дома и тука да си ја градат иднината. Граѓаните се за интеграција, а не изолација. Имаме можност да се движиме напред кон подобро, кон полноправно членство на ЕУ до 2030 година“, кажа пратеникот.

Каевски рече дека имаме историска шанса, сериозна поддршка од ЕУ и САД за продолжување на европскиот пати дека не смееме да дозволиме да го загубиме овој моментум.

„Преговарачката рамка е усвоена од сите 27 земји членки и таа обезбедува и гарантира целосна заштита на македонскиот јазик и идентитет. Не може државата да биде заложник на кариерата на антиевропски политичари. СДСМ ќе направи сѐ за да државата да оди напред, ќе направиме сѐ за граѓаните да живеат во европска држава, со европски животен стандард“, заклучи Каевски.