Мемоарите на Мајкл Даглас продолжуваат да бидат актуелна тема, а најинтересните детали се однесуваат на неговиот љубовен живот и бракот со Кетрин Зита-Џонс.

Кога Мајкл Даглас и Кетрин Зита-Џонс ја започнаа својата врска и се обидуваа да одржат романса на далечина, актерот се соочи со конкуренција многу поблиску до нејзиниот дом – од соседот Коби Брајант.

Откако се запознаа во Франција во 1998 година, на парот му беше тешко да минува време заедно бидејќи Даглас живееше во Њујорк, додека актерката – тогаш 29-годишна ѕвезда на филмот „Маската на Зоро“ – живееше во Лос Анџелес.

„Таа имаше куќа во Палисејдс, веднаш под домот на Коби Брајант“, напиша актерот во своите нови мемоари, насловени One Helluva Ride.

Во тоа време, НБА-ѕвездата на „Лос Анџелес Лејкерс“ сè уште ја немаше запознаено Ванеса Лејн, со која се венча две години подоцна, во 2001 година.

„Очигледно, Коби постојано наоѓаше изговори да наврати кај Кетрин“, се присетува Даглас, кој е 25 години постар од неа. „Не сум сигурен колку пати го ’изгуби кучето‘, но тоа се случуваше често!“

Актерската кариера на Зита-Џонс беше во подем, а снимањето филмови како Entrapment со Шон Конери и High Fidelity со Џон Кјузак често ја носеше далеку од Лос Анџелес – а со тоа и подалеку од Брајант.

„Но, почнавме редовно да разговараме по телефон сè додека конечно не можевме повторно да се видиме“, изјави Даглас. Парот се сврши во новогодишната ноќ во 1999 година, пет месеци пред Брајант да ја побара раката на Ванеса Лејн во мај 2000 година.