Општествени прашања, главно социјалните теми и семејната драма, се темите кои ги анализираат претставите на Струмичкиот и на Турски театар од Скопје кои публиката на 57. МТФ „Војдан Чернодрински“ во Прилеп имаше можност да ги види како дел од официјалната програма.

Двете претстави отворааат прашања, едната за општествените, а другата за состојбите во семејството со траумите од детството. Ова беше речено на разговорите на тркалезната маса за претставите:„Циркус Пирандело“ во режија и адаптација на Бојан Трифуновски, во продукција на Струмичкиот театар и „Човек перница“ во режија на Сибел Абдиу на Турски театар од Скопје.

Публиката која го следи Македонскиот театарски фестивал „Војдан Чернодрински“, кој од 9 до 16 јуни се одржува во Прилеп, претпладнето во киното „Мис Стон“ уживаше во претставата од театарската работилница на Фестивалот и програмата насловена „Чернодрински за деца“.

Учениците од прилепското средно училиште „Ѓорче Петров“ ја изведоа својата претстава, работена со наставничката Билјана Тинтовска, а под менторство на режисерот Милош Андоновски.

Вечер на програмата на Фестивалот се уште две претстави во официјалната програма и со нив пред публиката ќе се прикажат осум од 10-те претстави на македонските професионални театари.

Од 19,30 часот во прилепскиот Центар за култура „Марко Цепенков“ ќе биде прикажана претставата „Балконот“ во режија на Арбен Кумбаро, а во изведба на Албански театар од Скопје.

Од 22 часот во прилепскиот народен театар „Војдан Чернодрински“, театар „Комедија“ од Скопје ќе ја изведе претставата „Женска гардероба“ во режија на Наташа Поплавска.