Проектот SEED+ овозможува, преку дигитално решение, подобрување на ефикасноста и безбедноста на трговијата со животни и производи од животинско потекло
Вчера во Скопје се одржа обука на ветеринарните инспектори и бизнис оператори вклучени во издавање ветеринарни сертификати за софтверот SEED+/CEFTA TRACES NT (Trade Control and Expert System New Technology). Оваа обука е дел од проектот SEED+ (Системи за електронска размена на податоци), а организирана во соработка со Стопанската комора, Агенцијата за храна и ветеринарство на Република Северна Македонија и Секретаријатот на ЦЕФТА.
Целта на обуката е да ги опреми учесниците со сеопфатно знаење и практични вештини потребни за ефикасно користење на платформата SEED+ за да се олесни трговијата со животни и производи од животинско потекло и истовремено да се обезбеди усогласеност со стандардите за ветеринарно здравје и безбедност.
Обуката вклучува длабинско разбирање на функционалноста на софтверот, опфаќајќи аспекти како што се регистрација на пратки, управување со шаблони на сертификати, внесување на релевантни податоци, инсталација на потребната документација и поднесување барања за здравствени сертификати. Поширокиот опсег на обуката вклучува подобрување на способноста на учесниците прецизно да ја проценат здравствената состојба на животните или производите од животинско потекло наменети за извоз или увоз, а со тоа да придонесат за спречување на пренос на болести и промовирање на безбедноста на храната.
„CEFTA TRACES NT овозможува точна и брза размена на ветеринарни сертификати, ефикасно ја поддржува проценката и управувањето со ризикот, обезбедува побезбедна трговска средина, ги намалува бариерите, ги намалува трошоците и го забрзува движењето на стоките низ ЦЕФТА. Воодушевена сум што придобивките од дигитализацијата во овој сектор сега ќе ги видат нашите економски оператори“, рече Една Караџа, проект менаџер на SEED+.
На важноста на процесите на дигитализација за економски просперитет на регионот се осврна Татјана Штерјова Душковска, генерален секретар на Инвестициски форум за Западен Балкан 6. (WB6CIF)
„Иднината на трговијата во регионот оди рака под рака со дигитализацијата и мило ми е што во текот на овие два месеци заедно со Секретаријатот на ЦЕФТА во сите 6 економии од Западен Балкан ја спроведуваме серијата практични обуки за економските оператори од целиот регион, со цел да се подготват за навигација и користење на платформата SEED+. Тоа ќе значи побрза и поефикасна регионална трговија, намалување на времето и трошоците на чекање и уште еден чекор напред кон постигнување на целта – Еден регион, Една економија – за која се залага Инвестицискиот форум за Западен Балкан 6.“ – изјави Штерјова Душковска.
„Дигитализацијата на процесите на ветеринарна инспекција носи ефикасност, точност и следливост. Задоволни сме што сме дел од проектот SEED+, кој го олеснува ова трансформативно патување. SEED+ го поедноставува издавањето ветеринарни сертификати, го централизира складирањето на податоците и обезбедува непроценлива поддршка за управување со ризик. Ова, пак, значително придонесува за заштита на јавното здравје и безбедност.“ рече Ванчо Новоселски, раководител на сектор за инспекциски надзор при Агенцијата за храна и ветеринарство.
Целта на обуките е да ги опреми учесниците со знаењето неопходно за успешно користење на SEED+/CEFTA TRACES, со што ќе се рационализираат трговските процеси, и ќе се обезбеди заштита на јавното здравје и здравјето на животните но и ќе се зајакне регионалната трговија.
