Неколку американски компании конкретно ја истакнаа корупцијата како пречка за директните инвестиции во Црна Гора, а корупцијата се смета за една од типичните пречки што треба да се надминат при водење бизнис во земјата, се вели во извештајот за Инвестициската клима објавен од Стејт департментот.
Според тој документ, Црна Гора презела чекори за подобрување на неефикасноста на судскиот систем, бидејќи судските постапки често резултираат со долги и долготрајни судења, објави РТЦГ.
„Последниве неколку години беа изменети процесните закони со цел да се подобри ефикасноста на постапката согласно стандардите на Европската конвенција за човекови права.Треба да се напомене дека најголем дел од жалбите кои се испраќаат до Европскиот суд на Човековите права против Црна Гора се однесуваат на членот шест од Конвенцијата – правото на правично судење во разумен рок“, се наведува во извештајот на Стејт департментот, во кој се истакнува дека се преземени одредени чекори за подобрување на состојбата на тој фронт.
Се нагласува дека корупцијата и перцепцијата за корупција се значајни проблеми во јавниот и приватниот сектор на Црна Гора.
„Корупцијата рутински се наоѓа високо на листата на загриженост на граѓаните во анкетите на јавното мислење, покрај ризиците наведени од странските инвеститори. Во текот на изминатата година, Владата постигна одреден напредок во борбата против корупцијата. Специјалното обвинителство започна неколку истраги за корупција на високо ниво кои резултираа со апсење на поранешниот претседател на Врховниот суд и поранешниот претседател на Стопанскиот суд.Понатамошните апсења во изминатата година вклучуваат поранешни членови на раководството на државната компанија Плантаже, како и истакнат обвинител од специјалното обвинителство“, се нагласува во извештајот.
Владата ги охрабрува државните институции и приватниот сектор да воспостават внатрешни кодекси на однесување, се вели во извештајот.
„Тие се охрабрени да имаат етички кодекси, како и обврска да имаат превентивни планови за интегритет. Црна Гора е потписничка на Конвенцијата на ОН против корупцијата“, се вели во извештајот.
Процесот на приватизација во Црна Гора моментално е во завршна фаза, се вели во документот.
„Повеќето од компаниите кои се уште не се приватизирани се од стратешко значење за црногорската економија и работат во областа на енергетиката, транспортот и туризмот“, се наведува во извештајот.
