Косовската полиција потврди дека по наредба на судот спроведува акција на пет локации во три општини на северот на Косово во врска со вооружениот конфликт што во неделата се случи во Бањска.

„Полициската акција ја продолжуваат надлежните единици на косовската полиција со присуство на обвинител на лице место“, се вели во соопштението.

Тие прецизираат дека граѓаните немаат причина за загриженост, додавајќи дека акцијата се спроведува во координација со ЕУЛЕКС и КФОР.

Медиумите во регионот потсетуваат дека пред зградата во која живееше потпретседателот на Српската листа, Милан Радоичиќ во северниот дел на Косово, се наоѓаат неколку косовски специјалци.

Тој беше поврзан со вооружениот конфликт во Бањска во кој беше убиен еден косовски полицаец, а најмалку тројца Срби.

Приштина тогаш објави видео на кое наводно е присутен Радоичиќ, во униформа, заедно со други вооружени лица, се наведува во написите на српските медиуми.