Русија повика на дијалог откако претседателот Трамп рече дека би било „одлично ако сите се ослободат од нуклеарното оружје“.

Кремљ нагласи дека разговорите треба да ги опфатат и европските нуклеарни арсенали. Францускиот претседател Макрон предложи да се прошири заштитата што ја обезбедуваат француските нуклеарни боеви глави и на другите земји на континентот.

Доналд Трамп рече дека би било одлично ако сите се ослободат од нуклеарното оружје.

„Знам дека Русија и ние имаме убедливо најмногу нуклеарно оружје. Кина ќе го има истото количество во рок од 4-5 години. Би било одлично ако сите можеме да се денуклеаризираме бидејќи моќта на нуклеарното оружје е луда“, рече Трамп.

Запрашан за изјавите, портпаролот на Кремљ, Дмитриј Песков, им рече на новинарите: „Неопходен е дијалог меѓу Русија и САД за контрола на оружјето, особено во однос на стратешката стабилност“.

Говорејќи во средата, Емануел Макрон ја нарече Русија „закана за Франција и Европа“. Москва го оцени неговиот говор како заканувачки и во него препозна „тонови на нуклеарна уцена“. Кремљ го опиша како многу конфронтирачки и тврди дека Франција се обидува да преземе „нуклеарно лидерство во Европа“.