Семејствата на израелските заложници земени од Хамас и други граѓани го блокираа автопатот што ги поврзува Тел Авив и Ерусалим, барајќи премиерот Бенјамин Нетанјаху да не го загрозува договорот за ослободување на заложниците.

Десетици луѓе држеа транспарент на кој пишуваше: „Земaњето заложници е воено злосторство“, пишува „Тајмс оф Израел“, додавајќи дека толпата поставила жолти димни бомби додека го блокирале автопатот.

Тие бараат Нетанјаху да престане да се заканува со договорот и да испрати тим во Доха за да преговара за втората фаза од прекинот на огнот, што би довело до итно ослободување на преостанатите заложници.

Хамас вчера најави дека ќе го одложи ослободувањето на израелските заложници, закажано за сабота, бидејќи, како што тврди, Израел ги прекршил условите од договорот за прекин на огнот. Израелската делегација се врати од Доха, каде викендов се водеа преговори за следната фаза од прекинот на огнот во Појасот Газа, изјави вчера портпаролот на израелскиот премиер Бенјамин Нетанјаху, не наведувајќи детали за преговорите.

Израел и Хамас постигнаа прекин на огнот во средината на јануари по повеќе од една година конфликт, потсетува Гардијан.

Првата фаза од прекинот на огнот, од трите планирани, вклучува прекин на огнот, ослободување на некои затвореници, повлекување на израелските сили од Газа и враќање на Палестинците во северниот дел на Газа, заедно со прилив на хуманитарна помош. Втората фаза предвидува прекин на огнот за 42 дена.

Во третата фаза Хамас ќе ги врати телата на загинатите заложници од Газа во Израел, Израел ќе ослободи уште затвореници, а треба да започне и петгодишен план за реконструкција, пренесува Танјуг.