Соборениот сириски претседател, Башар ал Асад, за првпат проговори откако бунтовниците го урнаа неговото владеење и тој побегна во Москва.

Асад објави јавна изјава на официјалниот профил на „Телеграм“ на сириското претседателство, велејќи дека одлучил да се изјасни за да „реагира на поплавата од дезинформации и наративи што се појавија“.

Во својата изјава тој вели вели, бидејќи сирискиот главен град Дамаск паднал во рацете на бунтовниците, отишол во руската воена база во провинцијата Латакија „да ги следи борбените операции“, по што видел дека неговите сили ги напуштиле своите позиции.

И базата Хмејмим била под засилени напади со беспилотни летала, објави Асад, додавајќи дека Русите одлучиле да го однесат во Москва и дека Сирија сега е во рацете на терористите.

„Моето заминување од Сирија не беше планирано ниту се случи во последните часови од битките, како што тврдат некои. Напротив, останав во Дамаск, извршувајќи ги своите обврски, до раните утрински часови во неделата, 8 декември 2024 година. “, објави тој.

„Во ниту еден момент од овие настани не размислував за повлекување или барање засолниште, ниту пак размислував за таков предлог од некој поединец или партија. Мојот единствен начин на дејствување беше да ја продолжам борбата против терористичкиот напад“, изјави поранешниот сириски претседател, чие семејство владееше со Сирија во изминатите 53 години. Асад се смета за одговорен за повеќе од половина милион смртни случаи и милиони раселени Сиријци за време на граѓанската војна која трае повеќе од 10 години.

Во пораката, тој се опиша себеси како посветен лидер и семеен човек кој останал во Сирија за време на граѓанската војна „со својот народ“.

„Никогаш не барав лична корист, но секогаш се сметав себеси за чувар на националниот проект, поддржан од верата на сирискиот народ, кој веруваше во таа визија“, рече тој.

Асад ја заврши својата изјава велејќи дека е „исполнет со надеж дека Сирија повторно ќе биде слободна и независна“.

Повикувајќи се на неколку високи сириски функционери, медиумите изминатиот викенд објавија дека неколку часа пред падот на Дамаск на 8 декември, Асад побегнал без да ги предупреди членовите на неговото семејство и најблиските соработници.