Доналд Трамп денеска ќе се сретне со украинскиот претседател Володимир Зеленски, по неколкудневните гласини дека средбата е малку веројатна. Републиканскиот претседателски кандидат ја најави средбата која треба да се одржи во неговата кула Трамп во Њујорк.

Зеленски е во САД за да присуствува на Генералното собрание на ОН и е еден од бројните странски претставници кои се обидоа да се сретнат со Трамп во последните недели пред изборите на 5 ноември. Одлуката на Трамп да се сретне со шефот на украинската држава следеа по деновите во кои претставници на кампањата и луѓе блиски до поранешниот претседател посочија дека таква средба е малку веројатна.

На својата социјална мрежа Truth Social, Трамп сподели е-пошта наводно испратена од Зеленски. „Дали би биле толку љубезни да му ја пренесете оваа порака од претседателот Зеленски на претседателот Трамп“, започнува маилот.

„Драг Доналд, се надевам дека си добро. Се сеќавам на телефонскиот разговор со вас – беше навистина добар. Сите ние во Украина сакаме да ја завршиме војната со праведен мир. Затоа мора да се стремиме да се разбереме и да бидеме во контакт.

Пред неколку дена побаравме средба со вас и навистина сакам директно и од прва рака да го слушнам вашето мислење. Знаете дека секогаш зборувам со голема почит за се што е поврзано со вас, и така треба да биде. Можам да бидам во Њујорк во петок, што би било добро време за средба.

Верувам дека е важно да имаме личен контакт и да се разбираме 100 проценти. Ве молам известете ми ако сте во градот во тоа време, навистина би сакал нашата средба да се одржи, како дел од нашите напори праведно да ја завршиме оваа војна. Со почит, Володимир“, се вели во е-маилот.

„Како што знаете, Зеленски побара да се сретне со мене. Ќе се сретнеме утре околу 9:45 часот во Трамп Тауер“, потврди Трамп подоцна на прес-конференција. Трамп повеќепати изјави дека ќе ја прекине војната меѓу Русија и Украина „во рок од 24 часа“, но никогаш не појасни како.

Во последните месеци тој беше особено критичен за помошта од милијарди долари на САД за Киев во војната против Москва и ја повика Европа да се „помести“. Зеленски веќе се сретна со претседателот во заминување Џо Бајден и со потпретседателката и кандидат на демократите Камала Харис.