Основното јавно обвинителство Велес донесе Наредба за спроведување истражна постапка против две лица за кои постои основано сомнение дека како соизвршители сториле кривично дело – Неовластено производство и пуштање во промет наркотични дроги, психотропни супстанции и прекурсори според член 215 став 1 во врска со член 22 од Кривичниот законик.

Осомничените, велешанец и велешанка, во патничко возило БМВ со скопски регистарски ознаки пренесувале од Скопје во Велес наркотична дрога која претходно ја набавиле. При преглед на возилото во близина на патарината кај Сопот полицијата пронашла 13,16 грама хероин и 13,17 грама мешавина од кофеин и парацетамол која се користи како додаток за зголемување на масата на некои дроги, а биле пронајдени и парични средства за кои постои сомнение дека потекнуваат од илегална продажба на дрога, извести Обвинителството.

Јавниот обвинител до судијата на претходна постапка од Основниот суд во Велес достави предлог за определување мерка притвор за двете лица, особено имајќи ја предвид опасноста да се дадат во бегство и да го повторат делото.