Американскиот претприемач и моментално најбогат човек на светот, Илон Маск, планира да донира околу 45 милиони долари месечно на новиот политички акционен комитет кој ја поддржува претседателската кандидатура на Доналд Трамп, пишува „Wall Street Journal“ повикувајќи се на анонимни добро информирани извори.

Комитетот „America PAC“, основан на крајот на мај, е финансиски поддржан од други познати личности од технолошкиот сектор, како што се браќата Тајлер и Камерон Винклвос, милијардери познати по инвестирањето во криптовалути.

На листата на донатори се најде и директорот на одборот на директори на компанијата на Маск SpaceX, Антонио Грасијас, кој претходно беше шеф на одборот на директори на Tesla, пренесува порталот „Верџ.

Комитетот близок до Доналд Трамп го поддржаа и ко-основачот на компанијата PayPal, Кенет Хаури, поранешен амбасадор на САД во Шведска за време на мандатот на Трамп, како и ко-основачот на софтверската компанија Палантир, Џо Лонсдејл, пренесува Танјуг.

Вредноста на биткоинот порасна по саботниот обид за атентат врз Доналд Трамп, бидејќи се верува дека ги зголеми неговите шанси за победа на ноемвриските претседателски избори во САД, јавува „CNBC“.

Трамп постојано се декларира како поддржувач на развојот на пазарот на криптовалути.