Романскиот второлигаш Корвинул Хунедоара е сензационален освојувач на Купот на таа земја и следната сезона ќе игра во квалификациите за Лига Европа.

Корвинул во финалето го совлада Оцелул Галати од првата лига по подобро изведување пенали (3:2). Во регуларниот дел од натпреварот резултатот беше 2:2.

Два гола за Оцелул постигна Aнес Рушевиќ во 27. и 58. минута од пенал, и двата пати за водство на фаворитот.

Сепак, упорните играчи на Корвинул одбија да го кренат белото знаме, Коман израмни на 1:1, па Манолас на 2:2.

Овој клуб е основан во 1921 година, четири пати во својата историја бил првак во втора лига, најдобар резултат во романскиот шампионат му е третото место во 1982 година, а сега е сопственик на првиот трофеј.

Успехот во купот на Корвинул му донесе пласман во Лига Европа.

Корвинул следната сезона ќе игра во првата лига, откако во последното коло од второлигашкиот плеј-оф успеа да избори место во највисокиот ранг на романскиот фудбал.