Министерот за внатрешни работи Панче Тошковски денес оствари работна посета на ОВР Македонски Брод и ОВР Крушево каде одржа работни состаноци со раководствата на двете организациски единици.

„ОВР Македонски Брод ги покрива Општините Македонски Брод и Пласница каде живеат околу 10 000 жители на прилично голема територија, додека ОВР Крушево ја покрива само Општина Крушево каде живеат околу 8000 жители.
Што се однесува до обемот на криминал и двете организациски единици бележат ниско ниво на евидентирани кривични дела и нарушувања на јавниот ред и мир“, вели тој и додава:

„Од аспект на човечки ресурси има солидна пополнетост, а состојбата со возила и материјално-технички средства е лоша и во иднина треба да се инвестира во овој дел. Објектот на ПК Самоков кој е во состав на ОВР Македонски Брод е во лоша состојба и поради несанирана кровна конструкција истиот е без струја, за што од страна на началникот биле пишувани проблемски информации, но проблемот се уштè постои“, издвои министерот Тошковски од денешниве посети.