Претседателот на Социјалдемократскиот сојуз на Македонија, Димитар Ковачевски, денеска во Македонски Брод, имаше средба со пензионерите, на која што се разговараше за ефектите од досегашните мерки за пензионерите, за идните мерки од програмата на СДСМ за пензионерите, како и за предлозите на пензионерите од овој регион.
На средбата, Ковачевски посочи дека досега секоја мерка е носена во комуникација и консултација со Сојузот на здруженија на пензионери, со цел да се подобри стандардот и условите за живот на пензионерите.
Владата предводена од СДСМ, овозможи раст на пензиите со носење на новата Методологија. Просечната пензија денес изнесува 20.195 денари што е за 6.400 денари повеќе во однос на 2016 година кога просечната пензија изнесувала нешто над 200 евра. Минималната пензија денес изнесува 13.150 денари, што е за 4.300 денари повисока во однос на 2016 година, односно повисока пензија за речиси 50%.
Воедно, и во време на најголемите кризи, беа предвидени мерки за помош на пензионерите во секој антикризен пакет. Во последниот 9-ти пакет, се издвоија 35 милиони евра за поддршка на 187.000 пензионери, со што пензионерите добија од 1.500-3.000 денари месечно финансиска поддршка со цел полесно да ја пребродат зимата и кризата.
Грижата за стандардот на пензионерите продолжува и преку мерките во четиригодишната програмата на СДСМ. Ковачевски на средбата посочи дека пензиите ќе продолжат да растат. Во програмата е предвидено просечната пензија да достигне 30.000 денари, а минималната пензија 20.000 денари, до 2028 година.
Програмата содржи и други мерки со кои ќе се обезбеди подобар животен стандард и достоинствена старот на пензионерите, како што е воведување на енергетски пакети за пензионери кои живеат сами од 1.500 денари месечно, 6 месеци во зимскиот период, со што ќе им се олесни семејниот буџет во текот на зимата, како и исплата на зимски регрес за пензионери, почнувајќи од декември 2024 година. Предвидено е воведување на пензионерска еднаквост што значи исплата на загарантирана минимална пензија на жените и мажите кои живеат со семејна пензија. Воедно, во програмата е предвидено воведување можност за систем за работно ангажирање на пензионерите, доброволно оние кои можат и сакаат, за дополнително финансиско зајакнување на пензионерите.
Ковачевски им порача на пензионерите дека СДСМ секогаш ќе се грижи за нив и ќе има континуирана соработка, со цел да имаат подобар стандард и да уживаат во плодовите од својот работен век и од вложениот труд.
