Потпретседателот на Владата за координација на политичките прашања на ресорите и министер за политички систем и односи меѓу заедниците, Артан Груби го пречека на состанок специјалниот претставник на Република Словенија за Западен Балкан, Анжеј Франгеш.

Како што се наведува во соопштението, на средбата се разговарало за актуелните прашања во земјата и регионот, соработката меѓу двете земји, евроинтеграциите, како и претседателските и парламентарните избори во Република Северна Македонија.

Груби и Франгеш ги поздравија одличните билатерални односи и изразија очекување дека воспоставената активна динамика на соработка ќе продолжи уште повеќе во сите сфери.

Заблагодарувајќи му се на специјалниот претставник Франгеш за поддршката што Словенија ја дава на нашиот евроатлантски пат, Груби ја истакна определбата дека Република Северна Македонија ќе продолжи да биде земја посветена на безбедноста преку единство, како и добри односи со соседните земји, европските земји и САД како пријателски земји.

Двајцата соговорници разговараа и за претседателските и парламентарните избори и за идната ориентација на земјата, вклучително и за важноста на уставните измени како клучен услов за земјата да напредува во преговорите за членство во Европската унија, за подобра иднина за целиот регион.