Бројот на загинати од силниот земјотрес во Тајван се искачи на 13 во саботата, откако беше пронајдено уште едно тело во тешко погодениот национален парк Тароко, при што стотици луѓе се уште се заглавени.

Во источниот град Хуалиен, во близина на епицентарот на земјотресот со јачина од 7,2 степени според Рихтер, патиштата во планинските области остануваат блокирани од повеќекратни лизгања на земјиштето.

Спасувачките екипи во саботата пронајдоа едно тело во националниот парк и продолжуваат со напорите да ги извлечат останатите затрупани под карпите. Пронаоѓањето на телата го зголеми бројот на загинати на 13, соопшти националната противпожарна служба, а шест лица се уште се водат како исчезнати.

Во катастрофата се повредени најмалку 1.145 лица. Според властите, повеќе од 440 луѓе, вклучително и туристи и жители, се заробени на неколку места во паркот познат по ридскиот терен.

Министерот за внатрешни работи Лин Ју-чанг, кој претседава со централниот оперативен центар за вонредни состојби, рече дека некои делови од оштетените патишта се поправени и дека владата ќе ги премести заглавените луѓе на безбедно колку што е можно побрзо.

Лин рече дека спасувачки тим од Турција ќе пристигне во Тајван за да помогне во потрагата по исчезнатите лица во паркот.